ФОТОГАЛЕРИЈА

На празникот Покров на Пресвета Богородица, во црквата „Успение на Пресвета Богородица“ во Велес, Неговото Високопреосвештенство, Митрополитот Повардарски г. Агатангел, во сослужение на бројно свештенството на Повардарската епархија, отслужи сеноќно бдение со Света Божествена Литургија.

По благослов на Митрополитот Повардарски г. Агатангел, на овој голем Богородичен празник повторно беше воспоставена оваа древна богослужбена пракса во Повардарската епархија, која претставува особено значаен израз на православната духовна традиција, молитвениот подвиг и литургискиот живот на Црквата.

На бдението присуствуваше многуброен верен народ од сите архиерејски намесништва на Повардарската епархија, кој во заедничка молитва го прослави празникот посветен на Пресвета Богородица. Голем број верници останаа до раните утрински часови, пристапувајќи кон Светите Христови Тајни и причестувајќи се со Светите Христови Дарови.

Сеноќното бдение е древен богослужбен чин на непрестајна молитва, духовна будност и подготовка за средба со Господа. Преку псалмопеењето, молитвите и светата Евхаристија, верните се повикуваат кон подлабоко заедничарење со Христа и исполнување на својот христијански живот.

Нека молитвеното застапништво на Пресвета Богородица, чиј свет Покров го прославуваме, биде закрила и утеха за сите верни, а Господ Исус Христос да ги укрепува во верата, надежта и љубовта, дарувајќи им мир, духовна радост и спасение. 

ФОТОГАЛЕРИЈА

На 11.10.2026 година, во деветнаесеттата недела по Педесетница, Неговото Високопреосвештенство, Митрополитот Повардарски г. Агатангел, отслужи Света Божествена Литургија во црквата „Св. вмч. Димитриј“ во Кавадарци.

Со благослов на Неговото Високопреосвештенство, Митрополитот Повардарски г. Агатангел, од печат излезе книгата „Најдобриот воспитувач“, во издание на Издавачката дејност на Повардарската епархија „Св. Ѓорѓи Полошки“.

Насловот на оваа книга во себе ја носи и нејзината најдлабока порака: Најдобриот воспитувач е Бог.

Човекот може да поучува, да насочува, да советува и да воспитува, но вистинското преобразување на човековото срце се случува под Божјото раководство. Бог е Оној Кој нè учи на љубов, милост, смирение, трпение и добродетели, Кој нè исправува кога грешиме и нè повикува постојано да растеме во верата и во доброто.

Затоа, христијанското воспитание не е само пренесување знаење и правила, туку водење на човекот кон Бога. Родителот, учителот, воспитувачот и духовникот се повикани да бидат сведоци на доброто и со својот живот да му го покажат на човекот Патот кон Христос.

Делото Најдобриот воспитувач од српски јазик на македонски го преведе свештеникот Јани Мулев.

Цена на книгата: 500 денари

Книгата можете да ја порачате во Издавачката дејност на Повардарската епархија на тел: 043 221 231, да испратите порака на е-пошта: Оваа адреса на е-пошта е зашититена од спем-ботови, потребно е да го вклучите Javascript-от за да ја погледнете , или, пак, да пишете порака на нашата ФБ страна.

На 4 октомври 2026 година, во Неделата посветена на сите македонски светители, во Соборниот храм „Свети Климент Охридски“ во Скопје, Неговото Блаженство, Архиепископот Охридски и Македонски г. г. Стефан, во сослужение со Нивните Високопреосвештенства, Митрополитите: Преспанско-пелагониски г. Петар, Струмички г. Наум, Повардарски г. Агатангел, Европски г. Пимен, Брегалнички г. Иларион, Тетовско-гостиварски г. Јосиф, Кумановско-осоговски г. Григориј и Дебарско-кичевски г. Георгиј и Нивните Преосвештенства, Епископите: Дељадровско-илинденски г. Јоаким и Делчевско-каменички г. Марко, како и во молитвено присуство на Епископот Хераклејски г. Климент, чиноначалствуваше на Светата Божествена Литургија.

Во присуство на многуброен верен народ, ова свето и свечено литургиско собрание беше посветено и на одбележувањето на значајниот јубилеј – 40 години од епископската служба на Неговото Блаженство, Архиепископот Охридски и Македонски г. г. Стефан.

Четири децении архипастирска служба се четири децении исполнети со молитва, пожртвуваност, духовна грижа и неуморно служење на Светата Црква и на верниот македонски православен народ. Со својата мудрост, смиреност и љубов кон Црквата, Неговото Блаженство остави длабока трага во современиот живот и сведоштво за истрајноста во верата и во црковното дело.

По повод овој голем и благословен јубилеј, од сѐ срце му упатуваме искрени честитки на Неговото Блаженство, Архиепископот Охридски и Македонски г. г. Стефан, молејќи го Семилостивиот Господ да му подари добро здравје, духовна крепост, мудрост и сила, за уште многу години со љубов и достоинство да ја продолжи својата архипастирска служба.

Нека Господ го укрепува во неговото свето дело, нека го дарува со Својата благодат и нека му подари уште многу благословени и плодотворни години на архиерејско служење, на радост и полза на Светата Црква и на целиот верен македонски народ.

На многу години, Ваше Блаженство!

Повеќе фотографии на сајтот на Скопската епархија на МПЦ-ОА

 Православна светлина бр. 79

Возљубени,

со особена радост го споделуваме 79. број на списанието „Православна Светлина“, трет број во јубилејната 20-та година од неговото печатење и духовно мисионерство.

Овој број, традиционално, пристигнува во благословениот период меѓу празникот Воздвижение на Чесниот Крст – Крстовден и Соборот на сите македонски светители, исполнет со молитва, духовна радост и благодарност кон Бога.

Со благослов на Неговото Високопреосвештенство, митрополитот Агатангел, „Православна Светлина“ продолжува да ја исполнува својата мисија – да го шири словото на верата, да ја негува православната духовност и да сведочи за богатото духовно и културно наследство на Македонската православна традиција.

Нека овој број биде уште една светлина на патот кон верата, љубовта, молитвата и духовното единство.

ФОТОГАЛЕРИЈА

Крстот нè повикува да се поклониме на распнатиот Христос. Крстот е знамето на православието, крстот е знамето на христијаните, крстот е спасението на човештвото, крстот го победува сатаната, крстот нè искачува во царството небесно.

На празникот на пронаоѓањето на чесниот Крст, Митрополитот Повардарски г. Агатангел отслужи Света Божествена Литургија во храмот на светото Вознесение Христово во Велес. На Литургијата сослужуваа повеќе клирици на Повардарската епархија, а пред чесниот Крст се поклонија голем број верници.