ФОТОГАЛЕРИЈА

Во втората недела по Педесетница, Митрополитот Повардарски г. Агатангел, во сослужение на бројно свештенство на Повардарската епархија, отслужи Света Божествена Литургија во Црквата „Св. Кирил и Методиј“ во Гевгелија. На Литургијата, молитвено присуствуваа голем број верници, кои се причестија со Светите Христови Тајни.

  

На 13.06.2026 година, Митрополитот Повардарски г. Агатангел присуствуваше на меѓународната литературна манифестација „Дванаесет Тивки Ѕвезди – 1943“ во Кавадарци, која се одржува во чест на дванаесетте ваташки младинци, чии имиња и жртва се вечен дел од нашата историја и колективна меморија.

ФОТОГАЛЕРИЈА

На 9 јуни 2026 година, Неговото Високопреосвештенство, Митрополитот Повардарски г. Агатангел, изврши канонска визитација на повеќе храмови на територијата на велешкото архиерејско намесништво на Повардарската епархија, кои се наоѓаат во завршна фаза на изградба и фрескоживопис.

Во текот на посетата, Митрополитот ги посети црквите „Св. апостоли Петар и Павле“ во населбата Превалец, „Св. Петка“ во село Лозово, „Св. пророк Илија“ во село Чалошево и „Св. Троица“ во село Мамутчево.

При посетата на светите храмови, Владиката непосредно се запозна со текот на работите поврзани со фрескоживописувањето, кое во моментот се изведува во сите четири цркви. Тој изрази задоволство од досегашната реализација на живописот и упати благодарност до сите ктитори, добротвори, свештенослужители и верници кои со својата љубов, труд и материјална поддршка придонесуваат за изградбата и украсувањето на овие свети храмови. Тој истакна дека подигањето и разубавувањето на Божјите домови претставува трајно сведоштво на верата и побожноста на верниот народ.

На крајот од визитацијата, Владиката посака успешно и навремено завршување на фрескоживописот, како и Божји благослов врз сите што учествуваат во овие богоугодни дела.

ФОТОГАЛЕРИЈА

Во Неделата на сите светии, Митрополитот Повардарски г. Агатангел чиноначалствуваше со Светата Божествена Литургија во црквата „Успение на Пресвета Богородица“ во Велес, во сослужение на повеќе свештенослужители од велешкото архиерејско намесништво на Повардарската епархија. На оваа Литургија, Митрополитот Повардарски г. Агатангел, согласно Одлуката на Светиот архиерејски Синод на МПЦ-ОА, го одликуваше досегашниот протоереј Драги Гаштарски со право на носење на граден крст, односно со достоинство протоереј-ставрофор.

На 06.06.2026 година, беа доделени дипломите на 58-мата генерација богослови при Македонската православна богословија „Свети Климент Охридски“ – с. Драчево, Скопје.

На свечената прослава, којшто се одржа во просториите на Богословијата, беа присутни: Неговото Блаженство, Архиепископот Охридски и Македонски г.г. Стефан, ректорот на Богословијата – Неговото Високопреосвештенство, Митрополитот Повардарски г. Агатангел, како и Митрополитот Тетовско-гостиварски г. Јосиф, којшто, воедно, беше и пратеник од Синодот на МПЦ – ОА на овогодишните матурски испити.

На доделувањето на дипломите присуствуваа и севкупниот наставнички колегиум на Богословијата, како и свештеници и монаси – поранешни ученици и почитувачи на просветната дејност на овој духовен расадник.

ФОТОГАЛЕРИЈА

На денот кога Светата Православна Црква го чествува споменот на светите рамноапостолни цар Константин и царица Елена, во храмот „Св. Јован Крстител“ во Велес беше отслужена Света Архиерејска Божествена Литургија.

Со Литургијата чиноначалствуваше Неговото Високопреосвештенство, Митрополитот Повардарски г. Агатангел, во сослужение на свештенослужители од Повардарската епархија. На ова евхаристиското чествување молитвено присуствуваа бројни верници кои се собраа да го прослават празникот на светите Константин и Елена, чиј живот и дело оставиле неизбришлива трага во историјата на христијанството.

Со празнична беседа кон верните се обрати протоереј Јован Илиев, кој говореше за значењето на верата и ревноста на светиот цар Константин и неговата мајка, светата царица Елена, кои преку својата посветеност кон Христа придонеле за ширењето и утврдувањето на христијанската вера низ светот и ги повика верните да останат цврсти во православната вера, следејќи го примерот на светителите кои со својот живот сведочеле за вистината на Евангелието.

На крајот од Светата Литургија, верниот народ пристапи кон Светата Тајна Причест, а присутните го примија архипастирскиот благослов од својот надлежен архијереј.

Нека молитвите на светите рамноапостолни Константин и Елена бидат застапништво пред Господа за нашиот народ, за светата Црква и за сите верни кои со љубов го прославуваат нивниот светол спомен.