Со благослов на Неговото Високопреосвештенство, Митрополитот Повардарски г. Агатангел, од печат излезе книгата „Најдобриот воспитувач“, во издание на Издавачката дејност на Повардарската епархија „Св. Ѓорѓи Полошки“.

Насловот на оваа книга во себе ја носи и нејзината најдлабока порака: Најдобриот воспитувач е Бог.

Човекот може да поучува, да насочува, да советува и да воспитува, но вистинското преобразување на човековото срце се случува под Божјото раководство. Бог е Оној Кој нè учи на љубов, милост, смирение, трпение и добродетели, Кој нè исправува кога грешиме и нè повикува постојано да растеме во верата и во доброто.

Затоа, христијанското воспитание не е само пренесување знаење и правила, туку водење на човекот кон Бога. Родителот, учителот, воспитувачот и духовникот се повикани да бидат сведоци на доброто и со својот живот да му го покажат на човекот Патот кон Христос.

Делото Најдобриот воспитувач од српски јазик на македонски го преведе свештеникот Јани Мулев.

Цена на книгата: 500 денари

Книгата можете да ја порачате во Издавачката дејност на Повардарската епархија на тел: 043 221 231, да испратите порака на е-пошта: Оваа адреса на е-пошта е зашититена од спем-ботови, потребно е да го вклучите Javascript-от за да ја погледнете , или, пак, да пишете порака на нашата ФБ страна.

На 4 октомври 2026 година, во Неделата посветена на сите македонски светители, во Соборниот храм „Свети Климент Охридски“ во Скопје, Неговото Блаженство, Архиепископот Охридски и Македонски г. г. Стефан, во сослужение со Нивните Високопреосвештенства, Митрополитите: Преспанско-пелагониски г. Петар, Струмички г. Наум, Повардарски г. Агатангел, Европски г. Пимен, Брегалнички г. Иларион, Тетовско-гостиварски г. Јосиф, Кумановско-осоговски г. Григориј и Дебарско-кичевски г. Георгиј и Нивните Преосвештенства, Епископите: Дељадровско-илинденски г. Јоаким и Делчевско-каменички г. Марко, како и во молитвено присуство на Епископот Хераклејски г. Климент, чиноначалствуваше на Светата Божествена Литургија.

Во присуство на многуброен верен народ, ова свето и свечено литургиско собрание беше посветено и на одбележувањето на значајниот јубилеј – 40 години од епископската служба на Неговото Блаженство, Архиепископот Охридски и Македонски г. г. Стефан.

Четири децении архипастирска служба се четири децении исполнети со молитва, пожртвуваност, духовна грижа и неуморно служење на Светата Црква и на верниот македонски православен народ. Со својата мудрост, смиреност и љубов кон Црквата, Неговото Блаженство остави длабока трага во современиот живот и сведоштво за истрајноста во верата и во црковното дело.

По повод овој голем и благословен јубилеј, од сѐ срце му упатуваме искрени честитки на Неговото Блаженство, Архиепископот Охридски и Македонски г. г. Стефан, молејќи го Семилостивиот Господ да му подари добро здравје, духовна крепост, мудрост и сила, за уште многу години со љубов и достоинство да ја продолжи својата архипастирска служба.

Нека Господ го укрепува во неговото свето дело, нека го дарува со Својата благодат и нека му подари уште многу благословени и плодотворни години на архиерејско служење, на радост и полза на Светата Црква и на целиот верен македонски народ.

На многу години, Ваше Блаженство!

Повеќе фотографии на сајтот на Скопската епархија на МПЦ-ОА

 Православна светлина бр. 79

Возљубени,

со особена радост го споделуваме 79. број на списанието „Православна Светлина“, трет број во јубилејната 20-та година од неговото печатење и духовно мисионерство.

Овој број, традиционално, пристигнува во благословениот период меѓу празникот Воздвижение на Чесниот Крст – Крстовден и Соборот на сите македонски светители, исполнет со молитва, духовна радост и благодарност кон Бога.

Со благослов на Неговото Високопреосвештенство, митрополитот Агатангел, „Православна Светлина“ продолжува да ја исполнува својата мисија – да го шири словото на верата, да ја негува православната духовност и да сведочи за богатото духовно и културно наследство на Македонската православна традиција.

Нека овој број биде уште една светлина на патот кон верата, љубовта, молитвата и духовното единство.

ФОТОГАЛЕРИЈА

Крстот нè повикува да се поклониме на распнатиот Христос. Крстот е знамето на православието, крстот е знамето на христијаните, крстот е спасението на човештвото, крстот го победува сатаната, крстот нè искачува во царството небесно.

На празникот на пронаоѓањето на чесниот Крст, Митрополитот Повардарски г. Агатангел отслужи Света Божествена Литургија во храмот на светото Вознесение Христово во Велес. На Литургијата сослужуваа повеќе клирици на Повардарската епархија, а пред чесниот Крст се поклонија голем број верници.

ФОТОГАЛЕРИЈА

Во храмот „Успение на Пресвета Богородица” во Велес, на празникот на светите и праведни Јоаким и Ана, родителите на Пресвета Богородица, беше отслужена Света Божествена Литургија.

Со Светата Литургија началствуваше Неговото Високопреосвештенство, Митрополитот Повардарски г. Агатангел, во сослужение со свештенослужители од сите архиерејски намесништва на Повардарската епархија.

Многумина верни, молитвено присуствуваа на Светата Литургија, а меѓу нив беа и пратеникот од Велес, г-дин Игор Здравковски, како и генералниот секретар на ВМРО-ДПМНЕ, г-дин Драган Ковачки.

Празникот на светите Јоаким и Ана нè потсетува на нивната длабока вера, молитва, трпение и непоколеблива надеж во Бога. И покрај долгогодишната бездетност, тие не престанале да се молат и да ја полагаат својата надеж во Господа. Нивната молитва била благословена со раѓањето на Пресвета Богородица, преку која во светот дошол Спасителот Христос.

Светите Јоаким и Ана остануваат пример за христијанските семејства – за љубовта меѓу сопружниците, за молитвата, трпението и довербата во Божјата промисла. Особено се почитуваат како застапници на семејството, родителството и децата.

Посебна радост за верниот народ во Велес беше и донесувањето на иконата на Света Ана од Скитот на Света Ана на Света Гора Атонска.

Иконата беше донесена во храмот и подарена на црквата од благочестиви поклоници од Велес, кои ја донесоа како дар и спомен од своето поклонение на Света Гора.

Со овој благословен дар, храмот „Успение на Пресвета Богородица” доби уште едно свето место пред кое верниот народ ќе може да се моли и да го проси застапништвото на светата праведна Ана.

Нека молитвите на светите и праведни Јоаким и Ана бидат со сите нас, со нашите семејства и со нашиот народ, и нека Господ, по нивните молитви, ни подари вера, мир, љубов и спасение.

ФОТОГАЛЕРИЈА

На празникот на раѓањето на мајката над сите мајки, мајката од чија утроба се роди Спасителот на светот, која што прва го слушна гласот на ангелот како и довикува: „Радувај се, благодатна! Господ е со тебе! Благословена си ти меѓу жените!“, многуброен народ доаѓа да ги посети Божјите храмови низ целиот свет и со молитвено поклонение и молитви кон Божјата Мајка да го побара нејзиното застапништво пред престолот на Господ Бог, Исус Христос.

Митрополитот Повардарски г. Агатангел на денешниот празник чиноначалствуваше со Архиерејската Божествена Литургија во Согленскиот манастир.