По повод Воскресението Христово, протоерејот Зоран Грозданов од Повардарската епархија со благослов на Митрополитот Европски Пимен и Митрoполитот Повардарски Агатангел ги посети македонските православни верници во градот Утрехт, во Краството Холандија, каде отслужи Света Божествена Литургија во римокатоличкиот храм „Св. Антониј“ пред повеќе од 400 верници, на која со Светите дарови се причестија многумина од присутните.

Исто така свештеникот Грозданов посети многу домаќинства и изврши осветување на повеќе нововселени домови.

На втор ден Велигден, свештеникот Грозданов беше во посета на г-нот Љубе Бошковски и г -нот Јохан Тарчуловски во затворот Шевенинген, каде се изврши молебен кон Пресвета Богородица, Свети Климент и сите македонски светии, за нивно што поскорешно ослободување и враќање во нашата земја Македонија. Исто така, при овој чин двајцата се исповедаа и причестија.

Протоерејот имаше прилика да им го честита Воскресението Христово на сите затвореници од некогашните југословенски простори кои се наоѓаат таму на кои тој им подари мали икони и велигденски јајца.