Црковно-градежните активности кои започнаа во градот Велес продолжуваат со несмален интензитет. Новите административни простории со крстилница и параклис, посветен на Охридскиот чудотворец, Св. Наум во Велес, успешно напредуваат. Параклисот, кој се гради во непосредна близина на црквата „Успение на Пресвета Богородица“ во Велес , ќе биде првиот храм посветен на овој светител во Повардарската епархија. Параклисот и административните простории се градат со средства на Повардарската епархија. Во исто време започна и целосното реновирање на седиштето на Повардарската епархија во градот Велес, при што при крај е комплетно реновирање на административната зграда (надворешна термоизолација, замена на постоечките врати и прозори, замена на целата водоводна и електрична инсталација, замена на покривот, целосно реновирање на санитаријата, како и ентериерно преуредување).