Запис врежан врз светиот кивот со моштите на новомаченикот:

„Оваа света глава му припаѓа на новомаченикот Агатангел, којшто маченички пострада во 1727 година од следнава причина:
Кога сите Агарјани, имајќи си зол обичај, во трите дена на бајрам го потурчуваа секој христијанин што ќе го најдеа, тој не можеше да го поднесе тоа, па замина во царскиот сарај, при тоа сочинувајќи и ферман, и со Божјо содејство - попуштија. Оние, пак, не поднесувајќи го ова, го убија, а главата негова беше воскрасена во дните на кир Григориј Пелагонијски, а од ереите беа тогаш: сакелариј поп Георгиј, како и сакелиите поп Георгиј, поп Христо, поп Трајан, поп Наум, поп Вангел, поп Васил, поп Георгиј, 1827, февруари 25“.
Синаксар на празникот на „Св. Агатангел Битолски“

На празникот на кој Светата православна црква го чествува споменот на Светиот новомаченик Агатангел Битолски, Неговото Високопреосвештенство, Митрополитот Повардарски, кој го носи името на овој маченик, отслужи Литургија на претходно осветени дарови во храмот „Успение на Пресвета Богородица“ во Велес во сослужение на сите намесници од Повардарската епархија.

Со празнично слово и именденска честитка од името на целиот клир и целото патство на Повардарската епархија се произнесе свештеник Драги Гаштарски, кој му посака на Митрополитот Агатангел како и досега, успешно да долголетсвува на почвата Господова, и уште долги години да биде пример за ревносно извршување на Словото Божјо и ревносната љубов кон својот македонски народ, кој сите ние ќе го следиме.

По завршувањето на Литургијата беше осветен и прекршен славскиот колач и беше послужена трпеза на љубовта.

На многаја лета, Владико свет.

  

  

  

Во втората недела од Великиот Пост, посветена на Свети Григориј Палама, беше отслужена Света Божествена Литургија во храмот „Успение на Пресвета Богородица“ во Демир Капија. Со Литургијата чиноначаслствуваше Митрополитот Повардарски г. Агатангел, во сослужение на повеќе свештенослужители.

Во својата проповед, Митрополитот Агатангел го истакна значењето на Светиот Григориј Палама за православната црква, а повторно го истакна и значењето на молитвата, покајанието и исповедта за време на Великиот пост и ги повика верниците почесто и вистински да ги практикуваат овие Свети тајни. 

На 07. 03. 2015 година, во саботата од втората седмица од Великиот Пост, како што е предвидено во типикот на Црквата, во храмот „Свето Вознесение Христово“ во Велес се отслужи заупокоена Златоустова Литургија. На Литургијата чиноначалствуваше Митрополитот Повардарски г. Агатангел во сослужение на повеќе свештенослужители.

  

  

  

  

  

На 06. 03. 2015 година, во петок од втората седмица од Великиот Пост, во храмот „Успение на Пресвета Богородица“ во Велес се отслужи втората статија од Богородичниот Акатист. На вечерната богослужба сослужуваа протоереј Ристе Јанушев, свештеник Борислав Бобевски и свештеник Драги Гаштарски, а присуствуваше и Митрополитот Повардарски г. Агатангел.

На крајот на вечерната богослужба беа благословени и прекршени празничните лебови.

Останатите статии од Акатистот кон Пресвета Богородица ќе се служат на мало повечерие во секој нареден петок од Великиот Пост во храмовите „Успение на Пресвета Богородица“ и „Св. вмч. Пантелејмон“ во Велес, како и во останатите храмови на територијата на Повардарската епархија.