На денешен ден (29. август по стариот, односно 11. септември по новиот календар), Црквата го оживува споменот за маченичката смрт на Свети Јован Претеча. Претеча е оној кој брза пред некого за да ја објави веста за Неговото доаѓање и тоа е едно од имињата на овој светител. Тоа име на Свети Јован е сосема разбирливо и оправдано, зашто целиот свој живот, од неговото зачнување, па сè до телесната смрт, тој непрекинато сведочеше дека Исус навистина е Бог и Син Божји.

Чествувањето на Отсекувањето на главата на Свети Јован Крстител во Велес започна во предвечерјето на овој голем празник, со Вечерна Богослужба во манастирот посветен на Св. Јован Крстител во местото Ветерско. Со Вечерната Богослужба чиноначалствуваше Митрополитот Повардарски г. Агатангел, во сослужение на свештенство од велешкото архиерејско намесништво. После свечената вечерна богослужба, Митрополитот Агатангел одржа свечено слово за духовниот живот на Свети Јован Крстител, за неговата праведност, како и за спремноста да се жртвува за вистината, кога станува збор за изобличувањето на гревот.

 

 

 

Утредента, на самиот празник, во Црквата “Вознесение Христово (Св. Спас)” во Велес беше отслужена Света Божествена Литургија, со која чиноначалствуваше Митрополитот Повардарски г. Агатангел, а после Водосветот и прекршувањето на празничниот леб за сите присутни беше подготвена трпеза на љубовта.

 

 

 

Отсекувањето на главата на Свети Јован Крстител

Ирод Антипа, синот на стариот Ирод, убиецот на Витлеемските младенци во времето на раѓањето на Господ Исус, беше господар на Галилеја во времето на проповедта на Свети Јован Крстител. Овој Ирод беше оженет со ќерката на арапскиот кнез Арета. Но бидејќи зол изданок од зол корен, Ирод ја протера својата законска жена и незаконски ја зеде за сожителка Иродијада, жената на својот брат Филип, којшто сѐ уште беше жив. Против ова беззаконие стана Свети Јован Крстител и силно го изобличи Ирод. Ирод го фрли во затвор. За време на еден пир во неговиот дом во Севастија Галилејска пред гостите играше Салома, ќерката на Филип и Иродијада. И пијан и занесен од таа игра, Ирод ѝ вети на танчерката дека ќе ѝ даде сѐ што ќе посака, па дури и кога би побарала половина од неговото царство. Наговорена од мајка ѝ, Салома ја побара главата на Свети Јован Крстител. Ирод нареди и му ја отсекоа на Јован главата во затворот, па му ја донесоа на Ирод на чинија. Учениците Јованови ноќе го зедоа телото на својот учител и чесно го погребаа, а Иродијада го избоде со игла Јовановиот јазик, а главата му ја закопа на некое нечисто место. Што стана понатаму со главата на Светиот Предвесник опишано е под 24 февруари. Но набрзо оваа група злосторници ги постигна Божја казна. За да ја измие честа на својата ќерка кнезот Арета удри со војска на Ирод и го порази до темел. Поразен Ирод беше осуден од кесарот Калигула на прогонство, најнапред во Галија, а потоа во Шпанија. Како прогонети Ирод и Иродијада живееја во беда и понижувања, додека земјата не се отвори и не ги проголта. Салома загина со зла смрт на реката Сикорис (Сула). Смртта на Свети Јован се случи пред Пасха, а празнувањето на 29 август е востановено затоа што тој ден е осветена црквата којашто на неговиот гроб ја подигнаа во Севастија Светиот цар Конастантин и неговата мајка, Светата царица Елена. Во таа црква се положени моштите на Јовановите ученици: Елисеј и Авдиј.