Драги браќа и сестри!

Денес, по ваша слободна волја, крштевајќи се во водите на реката Треска, исто онака како што и Самиот Господ Исус Христос беше крстен од Св. Јован Крстител во водите на реката Јордан, вие ќе станете членови на Светата православна црква.

Крштението, драги мои, пристапувањето кон Црквата Христова, пред сè, значи да се исчистиме од нашите гревови, да се отргнеме од злото и вечно и постојано да се стремиме кон евангелските идеали, што се содржани во Божјите библиски пораки. Христијанските доблести, како што се: благочестивоста, добрината, меѓусебното почитување, љубовта и милостивоста, отсега па натаму постојано ќе треба да бидат дел од нашиот секојдневен живот. Почитувајќи ги и живеејќи ги овие идеали, како вистински Христови ученици, ние сме само на чекор од царството Божјо и на чекор до нашиот Бог, а тоа значи дека нашето спасение е сигурно, дека благодатта Божја веќе се симнала врз нас - на овој начин Митрополитот Повардарски г. Агатангел ги поздрави околу 200 верни кои во саботата на 01. 09. 2007 ја примија православната вера крштевајќи се во водите на реката Треска крај древниот манастир посветен на Успението на Пресвета Богородица на Матка крај Скопје.

 

 

 

 

 

Чинот на Светото Крштение започна со Света Архиерејска Литургија со која чиноначалствуваше Митрополитот Повардарски г. Агатангел во присуство на поглаварот на Македонската Праволсвна Црква, Архиепископот Охридски и Македонски  г.г. Стефан. По светото Миропомазание и пострижувањето, службата продолжи во манастирскиот двор, кадешто верните се причестија со Светите Тајни Христови. По крштевањето беше подготвена трпеза на љубовта.