За подвигот на служењето

(Што е и зошто постои мисионерско-хуманитарната дејност „Ѓаконија“)

Самиот зборот „Ѓаконија“ значи да служиш некому, односно активно и жртвено да ја изразуваш својата љубов и своето милосрдие кон некој што има потреба од заштита, помош, поткрепа или духовно насочување.

          Самото име на нашата дејност ја објаснува и смислата на нашето постоење. Ние го прифаќаме служењето како начин преку кој можеме да им помогнеме на сите наши браќа и сестри кои страдаат во овој свет. На подвигот на служење нè научи, но и непрестано нè усовршува најголемиот Слуга, нашиот Творец, Учител, Спасител и непресушен љубовен Извор, нашиот триличносен Бог – Отецот и Синот и Светиот Дух.

Ние од мисионерско-хуманитарната дејност „Ѓаконија“ подвигот или делото на служење условно го делиме на два основни дела: мисионерски и хуманитарен. Како што секоја личност има своја душа (внатрешен човек, духовна суштина) и свое тело (од Бога устроена материја) и потреба од грижа и храна и за едното и за другото, така и ние се грижиме за обете компоненти на човековото битие. За првата, духовната компонента, се грижиме преку нашата мисионерска дејност, односно со делото на служење преку лично сведочење за Христовото евангелие. А за втората, материјално-социјална компонента, се грижиме преку хуманитарната дејност, односно со делото на милосрдно љубовножртвено служење на ближниот.

Со мисионерската активност се трудиме на секоја личност која го бара Бога да и помогнеме во процесот на нејзиното духовно будење, растење и одење по патот на спасението. Живееме во време кога голем дел од луѓето не се доволно информирани, а камоли воведени во Божјото откровение и во животот на Црквата. А и во самата Црква имаме луѓе кои повеќе се традиционални и формални членови, а не живи Христови ученици. За да помогнеме на тоа поле, наши приоритетни задачи се живите лични контакти, но и издавањето на книги и списание, организирањето на предавања, трибини и богословски семинари. Наша цел е да помогнеме во богословскиот, парохискиот и литургискиот препород на нашата помесна македонска православна Црква.

          На хуманитарен план се трудиме да им помогнеме на оние наши браќа и сестри кои се на маргините на општеството поради својата материјална немаштина. За тие луѓе организираме и црковни кујни (трпези на љубовта) во Велес црковно-народната кујна во месноста Дворови, во која дневно се хранат повеќе од 200 луѓе, потоа во парохиските цркви „Св. Петка“ и „Св. Петар и Павле“ во Скопје. Нашата помош не завршува само на тоа. На многу социјално загрозени семејства, стари и изнемоштени лица и деца без родители им помагаме со пакети со прехрамбени производи и најнужни средства за лична хигиена. Дејноста ја насочуваме и како помош на сиромашните повеќедетни христијански семејства, а и на оние личности кои страдаат поради лош сплет на околности. Активно се вклучуваме во борбата против наркоманијата, алкохолизмот, пушењето и сите пороци кои негативно влијаат на здравјето на личноста, но и на нејзиниот духовен раст и смисла на живеење.

          Ние во „Ѓаконија“ знаеме дека нема да ги решиме проблемите на секојдневието на овие наши простори, но сметаме дека наша света должност и одговорност како Христови ученици и православни христијани е да се обидеме со подвигот на служење да помогнеме, и ако ништо друго, а мислиме дека и тоа не е малку, барем во човечките срца и умови да ја запалиме искрата на љубовта за да ја разберат тајната на служењето.

†

Членовите на „Ѓаконија“ своето дејствување во ова здружение го гледаат како составен дел од својот духовен живот во Црквата и како пат кон своето лично спасение, прочистување и усовршување. Подвигот на служењето е еден вид испит на квалитетот на нашиот духовен живот. Со нашето служење сакаме да го актуелизираме преданието и животот на ранохристијанската црковна заедница во нашите современи животни услови.

†

 Мисионерско-хуманитарната дејност на Скопската и Брегалничката епархија на Македонската Православна Црква “Ѓаконија” почна да дејствува од 1998 година со благослов на Неговото Блаженство архиепископот охридски и македонски г. г. Михаил. Нејзиното организационо-координативно и извршно тело го раководи и духовно надгледува Неговото Високопреосвештенство г. Агатангел, митрополит Брегалнички.

†

Како членови на Црквата, на Христовото семејство, како православни христијани, и вие можете да се вклучите во ова дело на служење и духовна преродба на нашата Црква со ваша лична помош, молитва или доброволен прилог.

          Вашите средства ќе помогнат:

-        за повеќе храна, облека, лекови,

-        за повеќе предавања, трибини, семинари,

-        за повеќе книги, брошури, списанија…

Адреса за контакт:

Мисионерско-хуманитарна дејност „Ѓаконија“,

Повардарска епархија,

ул. Ѓоре Органџиев бб,

1400 Велес, Република Македонија

email: Оваа адреса на е-пошта е зашититена од спем-ботови, потребно е да го вклучите Javascript-от за да ја погледнете

Телефони:

Митрополит г. Агатангел (за мисионерска дејност)          043/ 221 231

Отец Ангел Станчев (за хуманитарна дејност)                  043/ 529 298

Жиро сметка: 210063613820140

Тутунска банка