Силната и нераскинлива врска, која го поврзува македонското национално битие со православната вера, како основен мотив за формирањето и одржувањето на Семакедонскиот православен христијански собор, на овој трет по ред организиран собор уште еднаш беше цврсто потврдена и манифестирана. Архиереите на Македонската православна црква упатија апели за уште посилно зацврстување на таа врска, која го одржува македонското опстојување како непобитна реалност од самото зачнување на светот, па се до денес.

Овогодишниот собор се одржа во организација на Струмичката епархија, а духовен центар беше храмот „Св. 15 Тиверополски маченици“ во Струмица. Соборот започна со Света Божествена Литургија со која чиноначалствуваше Неговото Блаженство, Архиепископот Охридски и Македонски г. г. Стефан, во сослужение на Митрополитот Струмички г. Наум, Митрополитот  Дебарско-кичевски г. Тимотеј, Митрополитот Повардарски г. Агатангел, и Митрополитот Брегалнички г. Иларион.