Повардарска епархија - Прослава во Бигорскиот манастир

Прегледувате:

Прослава во Бигорскиот манастир

12.09.2008.

Празникот Отсекување на главата на св. Јован Крстител, предвесник Господов, е празник кој торжествено го одбележува и прославува Македонската православна црква, а велелепниот манастир „Св. Јован Бигорски“ е духовниот центар на молитвеното заедничарење на голем број верни души на овој празник. Таму, секоја година, со голема радост и почит доаѓаат голем број на верници и посетители од разни националности и вероисповеди за да се помолат пред чудотворната икона на св. Јован Крстител.

Во прекрасната црква, верниците исполнети со голема радост и љубов и со молитвен дух кон патронот и заштитникот на Бигорскиот манастир, присуствуваа на Вечерната богослужба со која чиноначалствуваше Митрополитот Повардарски г. Агатангел, во присуство на надлежниот архиереј г. Тимотеј, како и во сослужение на архимандритот Партениј и свештенослужители од Дебарско-кичевската епархија.

Дводневното празнување почна во средата вечер, со бдеење и вечера за гостите, а продолжи и вчера, на самиот празник, кога беше отслужена Божествена Литургија, а после Водосветот и прекршувањето на празничниот леб за сите присутни беше подготвена трпеза на љубовта, исто како и претходната вечер. Освен верници од сите краеви на Македонија, гостин беше и евроамбасадорот Ерван Фуере. Тој присуствуваше на замонашувањето на еден од браќата (Костадин Пеев) кој токму на овој празник минатата година ”стави метанија” и стана “послушник”. Доскорешниот искушеник, Костадин Пеев, го зеде црковното име Порфириј.