Во светогорскиот скит на света Ана, монахот Прокопиј од ќелијата „Воведение на Пресвета Богородица“ имаше голема желба да научи црковно пеење, за да може и тој да Го прославува Бога, како и другите браќа.

Но бидејќи беше малку немузикален отците избегнуваа да го учат црковно пеење. Братот Прокопиј имаше дар од Бога, постојано да ја кажува молитвата „Господи Исусе Христе, Сине Божји, помилуј ме, мене грешниот“ и во левата рака секогаш ја држеше бројаницата, од која никогаш не се делеше.

Еднаш, беше многу натажен, бидејќи не можеше да најде некого, кој би можел да го научи да пее и замислен за ова, од голема тага, беше престанал да ја кажува молитвата.

Одеднаш пред него се појави еден голем, но нему непознат старец, којшто му рече: „Брате Прокопиј, што ти е та си толку нажален? Што те загрижува?“ Прокопиј му одговори: „Што да ми биде старче, ете, сакам и јас да научам да пеам ама не се наоѓа ниту еден за да ме научи, зашто ми велат дека малку фалширам“. Тогаш белобрадиот старец му рече: „Затоа ли седиш и се грижиш, кутро чедо? Јас ќе те научам да пееш и ќе те направам најдобар псалт на Света Гора, и ќе пееш како најдобар славеј, ама сакам и ти да ми направиш една услуга“.

„Па добро, што сакаш од мене“, - му рече Прокопиј, „сакаш ли да ти платам? Ќе ти дадам сè што сакаш!“ Тогаш белобрадиот му рече: „Моја плата е да го фрлиш од рацете она, што го нарекувате бројаница, и да престанеш да го кажуваш она, што го нарекувате молитва, и јас ќе те научам на сè што сакаш“.

Монахот Прокопиј, штом ги слушна овие зборови сфати дека појавата пред него не е монах, туку прелукавиот демон, кој сакаше да го убеди да ја прекине молитвата, и веднаш се прекрсти и му рече: „Бегај од мене, сатано прелукав, не ми треба твоето пеење, ни твоите лукавства, ни твоите добрини“, и демонот стана невидлив.

Од овој настан научивме колку се плаши ѓаволот од бројаницата, за која добро велат отците дека е оружје на хрстијанинот против ѓаволот, и од молитвата, која го гори демонот. Додека, пак, од псалтите не се плаши толку и не ги смета за препрека, зашто преку пеењето лесно се одделуваат од молитвата и паѓаат во себељубие и гордост!

Превод од новогрчки:

Ѓакон Јани Мулев

Наслов на изворникот:

Ο διάβολος φοβάται το κομβοσχοίνι και την ευχή,

http://www.pigizois.net