Со Воскресна Вечерна Богослужба, со која чиноначалствуваше Митрополитот Брегалнички г. Иларион, а во сослужение на голем број на свештенослужители од повеќе епархии на Македонската Православна Црква, во Соборниот храм на Повардарската епархија „Св. вмч. Пантелејмон“, во саботата навечер започна одбележувањето на трите значајни јубилеи кои годинава ги празнува Повардарската епархија.

    По завршувањето на Вечерната Богослужба во храмот на светиот целебник Пантелејмон беше организирана Духовна академија, на која свое излагање по повод јубилеите имаше Митрополитот Агатангел, а програмата беше збогатена со прекрасниот настап на црковниот хор „ Св. вмч. Пантелејмон “ од Велес, монодрамата „Слово за Свети Климент“ во изведба на актерката Весна Димитровска и величествената изведба на композицијата „Оче Наш“ од страна на нашиот познат оперски пеач, маестро Борис Трајанов.