Возљубени,

со благослов на Неговото Високопреосвештенство, Митрополитот Повардарски г. Агатангел, храмот „Св. Кирил и Методиј“ во Велес, свечено ќе го одбележи празникот посветен на светите рамноапостолни браќа Кирил и Методиј - сесловенските и македонски просветители и учители.

По тој повод, на 23 мај, со почеток во 19 часот, ќе се отслужи празнична Вечерна богослужба, по што во дворот на храмот ќе се одржи пригодна културно-уметничка програма во чест на светите браќа и нивното непроценливо духовно и просветителско дело.

Следниот ден, на 24 мај, кога Светата Православна Црква го прославува нивниот светол спомен, ќе биде отслужена Света Божествена Литургија, со која ќе чиноначалствува Неговото Високопреосвештенство, Митрополитот Повардарски г. Агатангел, во сослужение на Митрополитот Кумановско-осоговски г. Григориј и свештенослужители од Повардарската епархија.

Ќе ни претставува особена чест, доколку со Вашето молитвено присуство го збогатите ова семакедонско и свечено празнично чествување.