ФОТОГАЛЕРИЈА

На 17 мај 2026 година, во Неделата на слепиот, во храмот „Света Петка“ во Кавадарци, молитвено и свечено беше отслужена Света Божествена Литургија, на која чиноначалствуваше Неговото Блаженство, Архиепископот Охридски и Македонски г. г. Стефан, во сослужение на Митрополитот Повардарски г. Агатангел, Митрополитот Струмички г. Наум, Митрополитот Тетовско-гостиварски г. Јосиф, како и на бројно свештенство од Повардарската епархија.

Светата Литургија помина во духот на заедништво, молитва и духовна радост, а голем број верници од Кавадарци и околните места молитвено присуствуваа на ова значајно богослужение. Во својата архипастирска поука, Неговото Блаженство говореше за духовното прогледување и силата на верата, повикувајќи ги верниците да останат цврсти во љубовта кон Бога, Црквата и ближните.

По завршувањето на Светата Божествена Литургија, беше извршен свечениот чин на осветување на новоизградениот црковен конак при храмот „Света Петка“. Чинот на осветување го изврши Неговото Блаженство Архиепископот Охридски и Македонски г. г. Стефан, во сослужение на Митрополитот Повардарски г. Агатангел, архиереите од Светиот архиерејски синод на МПЦ-ОА и бројното свештенство.

Изградбата на конакот претставува значаен духовен и пастирски придонес за црковниот живот во Кавадарци и Повардарската епархија. Овој објект е реализиран со средства на Повардарската епархија, како и со несебични прилози и поддршка од благочестивите жители и добротвори од градот Кавадарци.

Во рамките на новоизградениот конак се наоѓа параклис посветен на Свети Никола Мирликиски Чудотворец, чиј ктитор е Градоначалникот на Општина Кавадарци, г-дин Митко Јанчев. Покрај параклисот, конакот располага и со библиотека, административни канцеларии, приемни простории, трпезарија, кујна и други помошни простории, кои ќе служат за унапредување на духовниот, просветниот и црковно-општествениот живот на верниците.

Овој радосен и историски настан претставува уште едно сведоштво за живата вера и љубовта кон Светата Црква меѓу народот во Тиквешијата. Осветувањето на конакот е значаен духовен белег не само за храмот „Света Петка“, туку и за градот Кавадарци, неговите жители и целата Повардарска епархија.

Повардарската епархија изразува благодарност до сите приложници, добротвори, верници и помагатели кои со својот труд, љубов и поддршка придонесоа за изградбата на овој значаен црковен објект, молејќи се Господ да им дарува здравје, мир и духовен напредок.