ФОТОГАЛЕРИЈА

На денот кога го празнуваме споменот на влегувањето на нашиот Спасител Исус Христос во Ерусалим - Цветници, во сите поголеми храмови ширум Повардарската епархија беше отслужена Света Божествена Литургија. Митрополитот Повардарски г. Агатангел, во сослужение на бројно свештенство, чиноначалствуваше со Божествената Литургија во храмот „Св. Кирил и Методиј“ во Велес. На оваа Литургија, Митрополитот Повардарски г. Агатангел, согласно Одлуката на Светиот архиерејски Синод на МПЦ-ОА, ги одликуваше досегашните протоереи Борислав Бобевски и Игор Пармачки со право на носење на граден крст, односно со достоинство протоереј-ставрофор.

По завршувањето на Литургијата, во дворот на црквата, фамилијата Илиеви од Велес и нивната компанија „Шилер“, со благослов на Митрополитот Агатангел, традиционално поделија 2000 табли со јајца на велешани, а приредија и забава за најмалите велешанчиња.

Верниот православен народ од денешниот ден го започнува чествувањето на најтешката седмица во историјата на човештвото, седмицата на Христовите страдања која уште се нарекува и „Страстна“.