Возљубени браќа и сестри,

Би сакале да споделиме со Вас една голема духовна радост, а тоа е дека во склоп на нашата Издавачка дејност „Св. Ѓорѓи Полошки“, денеска излегоа од печат првите два тома од „Делата на свети Јован Златоуст“ кои со векови наназад се неодминлива духовна храна за секој искрен и посветен православен верник, насекаде во светот. Свети Јован Златоуст е „златната уста“, односно „духовната труба“ на Православието, воопшто. Тој е еден од најголемите, најпочитуваните, најчитаните, најцитираните и најзначајните Свети Отци и Учители на Црквата Христова, и затоа денес е историски ден за нашиот македонски православен народ, бидејќи за првпат на македонски јазик се издава едно вакво значајно капитално дело, потпишано од овој голем Светител и сенароден Учител. Останатите шест тома, од вкупно осумте, кои како цела едиција во најблиска иднина ќе бидат испечатени и издадени, се во фаза на подготовка. Овие први два тома ги преведе Анета Ѓеорѓиевска-Наковска. Целата едиција од осумте тома од „Делата на Свети Јован Златоуст“ се свечено издание на Повардарската епархија по повод официјалното признавање на автокефалноста на нашата света Македонска православна црква - Охридска архиепископија.

Преговор на едицијата „Дела на свети Јован Златоуст“