Почитувана г-ѓа Веселинка Маџарова - Андова, диригент на младинскиот црковен хор „Свети Кирил и Методиј“ од Велес,

Почитувана г-ѓа Летка Димовска - Полизова, диригент на хорот „Света Злата Мегленска“ од Скопје,

Почитувани хористи, свештеници и гости на овој исклучителен духовен и културен настан во нашиот град, во храмот на нашиот закрилник „Светиот великомаченик Пантелејмон“.

Овој храм е познат надалеку по својата архитектура, а особено поради уникатната акустика, за која се погрижиле мудрите архитекти уште при градењето на овој велелепен храм. Храмот и неговото богослужение има за цел да ги осветува сите сетила на човекот: видот - преку иконите и фреските, слухот - преку ангелските гласови на хористите, мирисот - преку мирисот на темјанот, вкусот - преку примањето на Светата Причест.

Чувствувам голема благодарност што ми е дадена таа чест да го отворам овој бележит настан, настан кој, веруваме, веќе ќе прерасне во градска традиција, настан кој ќе ги привлече сите љубители на културата и уметноста, да дојдат во храмот, и со побожен трепет и восхит, да го проследат духовното пеење и композиции од нашите диригенти и млади хористки.

Голема радост ми претставува кога ги гледам младиве деца, додека нивните врсници спијат, како секоја недела стануваат рано и доаѓаат во црква, за да Му пејат на Бога, да учествуваат во Литургискиот настан и да дадат свој придонес во убавината на богослужението. Верувам и убеден сум во длабочината на мојата душа, дека Бог го гледа нивниот труд и ги благословува, а тој благослов ќе ги следи низ целиот живот. Заслужуваат голема пофалба и поддршка од наша страна, и уште повеќе да се вложат себеси во работата која заедно со нивната наставничка, веќе неколку години ревносно ја исполнуваат. 

Минатата година, на првиот великопосен концерт, кога ја промовиравме Литургијата на Бадев, ѝ посакавме на почитуваната диригентка Веселинка Маџарова - Андова, да продолжи да твори, да компонира, и еве, само по една година веќе имаме привилегија, премиерно да ги чуеме нејзините авторски композиции со духовна содржина. Се радуваме и го поздравуваме овој гест, и повторно ѝ посакуваме да продолжи и понатаму да твори дела, кои Му се угодни на Бога.

Му благодарам на Министерството за култура што го вклучи нашиов град, градот на великиот исцелител и чудотворец свети Пантелејмон, да биде повторно град на културата, благодарни сме што и ние, Повардарската епархија, дадовме свој придонес во овој значаен настан за културата на градот.

Му благодариме и на градоначалникот и на советот на Општината што се вклучија во организацијата на овој свечен настан, со надеж дека и понатаму ќе бидат активни и доследни во оваа соработка.

А сега да им дозволиме на нашите ангелски гласови да ги исполнат нашите срца со радост и восхит. Да уживаме во оваа духовна наслада.

Митрополит Повардарски

+ Агатангел