На ден 20 .02. 2011 година (недела), се изврши чин на преосветување на црквата „Успение на Пресвета Богородица“ во Велес. Преосветувањето на црквата го изврши Неговото Блаженство, Архиепископот Охридски и Македонски Г.Г. Стефан во сослужение на надлежниот Митрополит на Повардарската епархија г. Агатангел, Митрополитот Дебарско-кичевски г. Тимотеј, Митрополитот Брегалнички г. Иларион, архимандритот Нектариј, игуменот на Лесновската обител, Дамаскин, игуменот Јосиф, како и бројно свештенство на Повардарската епархија. По извршувањето на чинот преосветување, беше отслужена Света Божествена Литургија, на која Митрополитот Повардарски г. Агатангел, заради направените заложби околу целосното реновирање на црквата, како и поради плодната свештено-пастирска дејност, благоволи и го произведе во чин протоереј, свештеникот Ристе Јанушев од Велес, кој е инаку и старешина на црквата „Успение на Пресвета Богородица“.

На чинот на преосветувањето, очекувано, молитвено присуствуваа голем број велешани, многу гости од други градови на Македонија, како и наши македонци од дијаспората кои заради оваа прилика специјално допатуваа назад во својата татковина. На Литургијата присуствуваа и градоначалникот на Општина Велес, г-дин Горан Петров, претседателот на Советот на Општина Велес, г-дин Славчо Чадиев, пратениците во македонското собрание г-дин Илија Димовски и г-дин Марјанчо Николов, полковникот Тони Поповски, како и многу други претставници на институциите во градот.

Во предвечерјето, пак, на овој настан, во саботата 19. 02. 2011 година, беше отслужена Вечерна Богослужба со која чиноначалствуваше Митрополитот Дебарско-кичевски г. Тимотеј во сослужение на архимандритот Нектариј и свештенослужители од Велес .

Во едноиполгодишното реновирање на црквата беа извршени следниве работи: направен е целосно нов фрескоживопис на црквата од страна на тајфата „Св. Ап. Лука“, направен е нов иконостас и владички трон од страна на копаничарот Љубомир Бисинов, потоа се направени нови икони на иконостасот, храмот е целосно обновен со градежни дејства (нов мермерен под, нова електрична инсталација, осветлување, подно затоплување, нови врати, прозори, комплетно нов црковен инвентар, престолна икона, певница и др.) Храмот е целосно реновиран со средства на Повардарската епархија и донации од верниците.