Skip to content
  • JoomlaWorks AJAX Header Rotator
  • JoomlaWorks AJAX Header Rotator
  • JoomlaWorks AJAX Header Rotator
Прегледувате: Насловна
    
  Sample Image   Sample Image   Sample Image   Sample Image Sample Image   Sample Image   Sample Image   Sample Image
 


Божикна забава
10.01.2012.
 
 

Со благослов на Неговото Високопреосвештенство, Митрополитот Повардарски г. Агатангел и оваа година во рамките на соработката на Повардарската епархија и здружението на деца заболени од церебрална парализа од Велес, Повардарската епархија организираше Божикна забава за овие дечиња. На ова дружење присуствуваа свештеници кои од името на Митрополитот Агатангел го благословија овој собир, а присуствуваше и градоначалникот на Општина Велес, кој ја поздрави оваа благородна активност. На оваа средба за првпат настапи новиот детски црковен хор при Повардарската епархија. На забавата сите дечиња кои беа присутни, како и оние кои не беа во можност да присуствуваат добија пакетчиња, кои беа донирани од фирмата „Макпрогрес“ од Виница кои исто така се вклучија во нашите активности за оваа благородна цел. На средбата присуствуваше и Билјана Џуфовска од ова здружение, која го изработи мотивот за Божикната честитка на Повардарската епархија. Оваа средба беше четврта по ред, а е со тенденција да продолжи и во иднина, а покрај оваа активност Повардарската епархија организира и две екскурзии годишно за дечињата членови на ова здружение.

 
 Sample Image
 
Рождество Христово - Божик
10.01.2012.
Sample Image
 
 Sample Image
 

На празникот на Рождеството на Господ Исус Христос, Митрополитот Повардарски г. Агатангел служеше Света Божествена Литургија во Соборниот храм „Св. вмч. Пантелејмон“ во Велес.

 Sample Image

 

На втор ден Божик, Митрополитот Агатангел отслужи Архиерејска Литургија во црквата „Св. Димитриј“ во Кавадарци.

 

 Sample Image

 

На празникот на Св. архиѓакон и првомаченик Стефан (трет ден Божик), Митрополитот Агатангел отслужи Архиерејска Литургија во црквата „Св. Атанасиј“ во Негорци.

  Sample Image

На трет ден Божик, кога Светата православна црква го чествува споменот на Светиот првомаченик и архиѓакон Стефан, во резиденцијата на Архиепископот Охридски и Македонски г.г. Стефан беше приреден свечен ручек по повод неговиот именден, на кој присуствуваше државниот врв: Претседателот на Република Македонија  г-дин Ѓорге Иванов, Премиерот г-дин Никола Груевски, и претседателот на Собранието г-дин Трајко Вељаноски. Од членовите на Светиот Архиерејски Синод на МПЦ на традиционалниот ручек присуствуваа  Митрополит Повардарскиот г. Агатангел  и  Митрополитот  Брегалнички г. Иларион.

 

 

 

 
Бадник
6.01.2012.

Sample ImageНа Бадник, Митрополитот Повардарски г. Агатангел присуствуваше  на Царските часови со Василиева Вечерна Литургија во црквата „Св. Спас“ во Велес. По завршувањето на Литургијата, Архиерејот и свештенослужителите ги осветија Бадниковите гранчиња.

 
Преподобен Наум, Охридски Чудотворец
6.01.2012.

 

Sample Image

 

На празникот на Свети Наум - чудотворец Охридски во храмот „Успение на Пресвета Богородица“ во Велес, се отслужи Архиерејска Божествена Литургија, со која чиноначалствуваше Митрополитот Повардарски г. Агатангел. На Литургијата, присутните верници молитвено му се поклонија на големиот семакедонски светител, а потоа се причестија со Светите Христови дарови.

Преподобен Наум Охридски  Чудотворец    

Ученик на Светите Методиј и Кирил и еден од Петточислениците коишто најревносно соработуваа со овие словенски апостоли. Свети Наум патуваше во Рим, каде што се прослави со чудотворна моќ и со голема ученост. Знаеше многу јазици. Со помош на царот Борис Михаил, по враќањето од Рим тие се населија на бреговите на Охридското Езеро. Додека Свети Климент дејствуваше како епископ во Охрид, дотогаш Свети Наум основаше манастир на јужниот брег на езерото. Тој манастир и денес го краси брегот како што и името на Свети Наум ја краси историјата на словенското христијанство и низ вековите беше извор на чудотворна сила и засолниште за болните и за неволните. Околу Свети Наум се насобра мноштво монаси од сите страни на Балканот. Беше мудар учител, единствен раководител на монасите, одлучен подвижник, чудотворен молитвеник и духовник. Неуморно се трудеше и на преведувањето на Светото Писмо и на другите црковни книги од грчки на словенски јазик. Вршеше чуда и за време на животот и после смртта. Неговите чудотворни мошти до ден денес восхитуваат со многубројни чуда, посебно со исцеленијата од тешки болести, особено од лудило. Се упокои во првата половина на 10 век.

 
Божикно послание
4.01.2012.

† А Г А Т А Н Г Е Л

 

ПО МИЛОСТА БОЖЈА

МИТРОПОЛИТ ПОВАРДАРСКИ,

ДО СВЕШТЕНОСЛУЖИТЕЛИТЕ, МОНАШТВОТО И ВЕРНИТЕ ЧЕДА НА МАКЕДОНСКАТА ПРАВОСЛАВНА ЦРКВА, ОДНОСНО ПОВАРДАРСКАТА ЕПАРХИЈА, ПО ПОВОД РОЖДЕСТВОТО ХРИСТОВО - БОЖИК, ИСПРАЌА АРХИПАСТИРСКИ БЛАГОСЛОВ И МИР ОД БОГА

 

Sample ImageВозљубени браќа и сестри!

Денес вечниот Бог се раѓа во времето. Бесплотниот се облекува во плот. Оној, Кој е зад границите на смртта, влегува во областа на смртноста. Денес, почнува крстниот пат Господов, ни се јавува жртвената, крстната божествена Љубов. Денес јаслите витлеемски ја претскажуваат онаа пештера, каде што ќе биде положен нашиот Господ Исус Христос, симнат од крстот по маченичката смрт... И сиот пат од животот Господов е исполнување на таа заповед за љубовта, која не знае за граници, за таа љубов, која својот живот го дава за своите ближни. Сите луѓе кои создавачкото Слово Божјо ги повикало кон постоење, биле Негови браќа и сестри, биле возљубени деца Божји, кои го изгубиле својот пат и кои Он дошол да ги побара.

Драги браќа и сестри!

Ние, како Христови следбеници, во денешниов празничен ден, можеме да го поставиме темелот на нашето лично покајание, па преку промена на мислите и срцата, да стапиме на патот Христов. Можеме со нови очи да се загледаме и со восхит да увидиме, дека Детето, родено во Витлеем е Живиот Бог, кој стана жив Човек заради нас и дека во тој Младенец се крие сета полнота на невидливиот и несфатливиот Бог. Да се радуваме и да Го воспеваме и ние денес Новородениот Христос, Кој се јави за да донесе меѓу луѓето мир, слога и братска љубов. Бог се симна на земјата за да му даде можност на човекот да се воздигне високо на небесата. Да се радуваме и веселиме зашто беа послушани од Бога молитвите наши и се исполнија зборовите на Отецот Небесен, искажани на нашите прародители Адам и Ева по нивниот престап, дека ќе дојде време кога ќе биде испратен Месија меѓу луѓето за да го помири со Бога грешниот човечки род. Да се радуваме и веселиме зашто Спасителот се роди преку непорочната Дева Марија и со тоа се исправи исконската неправда и се победи прародителскиот грев, кој се пренесува врз човечката природа од Адама, па сè до денес. На денешниов ден се роди долгоочекуваниот Емануил за кого пишуваа старозаветните пророци. Светна на хоризонтот ѕвездата што го најавуваше изгревањето на „Сонцето на правдата“. Се јави Утешителот на тие што страдаат, Избавителот на угнетените, Лекарот на болните, Надежта за правдољубивите и Востановувачот на еднаквоста меѓу луѓето во целиот свет.

Sample ImageВозљубени наши духовни чеда!

Во годината што изминува како македонски православни христијани имавме особена причина за радост и благодарење на Бога. Повардарската епархија на МПЦ и оваа година посвети огромно внимание на изградбата на нови и реновирањето на постојните духовни светилишта. Во градот Велес се пушти во употреба реновираната црква „Успение на Пресвета Богородица“, а се освети и новоизградената црква „Св. Петка“ во близина на манастирот „Св. Димитриј“. На камбанаријата на црквата во изградба, посветена на македонските просветители и учители рамноапостолните Св. Кирил и Методиј беа поставени новите црковни ѕвона, кои со своите велелепни звуци секојдневно го пренесуваат благословот Божји на жителите на нашиот град. Огромна е нашата радост што по еден подолг период интензивни подготовки се реализираше замислата за изградба на Болничка црква во градот Велес и затоа ја изразуваме нашата благодарност до сите оние, кои помогнаа да се оствари оваа дамнешна желба на велешките православни христијани. Во Кавадарци интензивно се работи на изградбата на новата црква посветена на Св. преподобна мајка наша Параскева, а во градот Неготино беа осветени возобновените конаци на манастирот „Св. вмч. Ѓорѓи“. Исто така на повеќе места низ градовите и селата од Повардарската епархија продолжуваат започнатите градежни зафати за изградба или реновирање на цркви, манастири, манастирски конаци и други придружни и помошни објекти.

Согледувајќи дека се наоѓаме во време на духовна криза, Повардарската епархија и оваа година сериозно се посвети на мисионерска и просветителска дејност, задржувајќи го континуитетот на своите редовни и периодични весници, списанија и книги, кои со својата извонредна духовна содржина, веруваме дека ќе придонесат за правилно воспитување на македонските православни христијани.

Ја користам оваа прилика да се заблагодарам на сите наши благочестиви христијани, кои преку донации на храна и облека го помагаат секојдневното нахранување на повеќе наши сиромашни браќа и сестри во Црковно-народната кујна во Велес. Благодатта на воплотениот Господ Исус Христос и љубовта на Бога Отецот и заедницата на Светиот Дух нека бидат со сите дарители, градители и украсители, кои со својот труд се вградуваат себеси како живи камења во Црквата Христова и како органи на Телото Христово, несебично работат за општото добро.

Возљубени чеда во Господа Исуса Христа!

Со овие желби и големи надежи ви го честитаме денешниот величествен празник и ви пожелуваме да го прославите во меѓусебен мир, љубов и разбирање. Срдечно ве повикуваме на денешниов радосен празник, со голема христијанска и евангелска љубов понизно да се поклониме пред Витлеемската пештера, со очите на просветениот дух да го видиме во јаслите новородениот Спасител и Месија, да му ги отвориме нашите души и срца, за да го примиме Неговото спасение и заедно со ангелите на небесата да запееме: „Слава му на Бога во височините и на земјата мир и меѓу луѓето добра волја“. Амин! 

 Христос се роди, навистина се роди…

 

 
Божикно издание на „Православна Светлина“
29.12.2011.

Sample ImageИзлезе од печат Божикното издание на списанието „Православна Светлина“.

Во новиот број се сместени содржини со кои би сакале да се обидеме да ги запознаеме верниците што подобро со традициите на црковниот живот, и со учењето на нашата Света Црква, и да придонесеме за што поголем интерес кај сите верници во Повардарската епархија, па и пошироко, за практикување на нашата православна христијанска вера. Во рамките на овој број се обработени повеќе теми од нашата православна христијанска вера, а со посебен нагласок на празнувањето на Рождеството на нашиот Спасител, Господ Исус Христос, Божик.

Се надеваме дека со ова Божикно издание на „Православна Светлина“, ќе ја зголемиме радоста која ја обзема секоја православна христијанска душа во овој дел од годината, кога го празнуваме раѓањето на Богочовекот Христос, Спасителот на светот.

Бесплатниот примерок од списанието можете да го најдете во сите цркви и манастири низ Повардарската епархија.

Со овој број ќе прославиме и еден јубилеј, а тоа е заокружувањето на петтата година од постоењето на ова списание.

 
Повеќе...
<< Почеток < Претходна 21 22 23 24 25 Следна > Крај >>

Резултати 913 - 943 од 943