На денот кога го празнуваме споменот на влегувањето на нашиот Спасител Исус Христос во Ерусалим - Цветници, во сите поголеми храмови ширум Повардарската епархија беше отслужена Света Божествена Литургија. Митрополитот Повардарски г. Агатангел отслужи Божествената Литургија во храмот „Св. Климент Охридски“ во Општина Чашка во сослужение на повеќе свештенослужители од Велес.

Верниот православен народ  од денешниот ден го започнува чествувањето на најтешката седмица во историјата на човештвото, седмицата на Христовите страдања која уште се нарекува и „Страстна“.

ЦВЕТНИЦИ

Влегувањето на Исус Христос во Ерусалим откако го воскресна четиридневно погребениот Лазар е мигот на најмногубројното и најрадосното препознавање во Него Господ и Спасител. Исус влегува во престолнината на осле, според старозаветното пророштво. Ова е уште еден од многубројните знаци по кои би можеле да Го препознаат, но сепак овој знак не го разбраа ниту Неговите ученици. Многуброен народ наслушна дека ќе дојде, па го дочекаа со палмови гранчиња во рацете. Значи, ги слекуваа облеките од себе постилајќи ги пред Него и во восхит возвикнуваа вдахновено: Осана! Благословен е Оној што доаѓа во името Господово, Царот Израилев! Дури и некои од дојдените Елини на поклонение за Пасха пристапија и молеа да Го видат. Единствено свештенството и фарисеите се озлобија готвејќи се да Го погубат брзо, а мислеа да го убијат и Лазар кој сведочеше за Неговата сила и за Неговото Божество. И повторно Господ се труди да им го открие Својот идентитет на насобраните и да ги подготви за најблиската иднина и за смислата на оваа мисија и нејзините искушенија. Всушност, кога им сеобраќа со словото за Крстот, тие тогаш го губат знаењето за Него како за Цар и Христос, тогаш им се затвара умот за словото и за Писмата. Цветници се празнуваат во неделата пред Воскресение. Претставуваат сигурно најдраматичниот празник меѓу Дванаесетте големи празници на Црквата. Го ознауваат почетокот на најтешката седмица во историјата на човештвото, којашто аскетското трезвеноумно познание на човековата природа ја нарекува „Страстна“.

  

На 19. 04. 2013 година,  во храмот „Успение на Пресвета Богородица“ во Велес беше отслужено мало Повечерие со целиот Акатист кон Пресвета Богородица. На богослужбата служеа протоереј-ставрофор Славе Јованов, протоереј Ристе Јанушев, свештеник Борислав Бобевски, свештеник Јованче Илиев, свештеник Драги Гаштарски и свештеник Игор Пармачки. Инаку ова беше последна служба во Великиот Пост, на која се чита Акатистот кон Пресвета Богородица, кој пак, за време на Великиот Пост се служи во петоците од петте седмици од Великиот пост.

По завршувањето на малото Повечерие традиционално беа осветени петолебија, кои верниците ги земаат за здравје и благосостојба.

  

/За сајтот на Повардарската епархија известува презвитера Павлина Илиева/

 

 

Во неделата посветена на светиот Јован Лествичник, Митрополитот Повардарски г. Агатангел отслужи Света Божествена Литургија во црквата „Свето Вознесение Христово“ во Гевгелија. На Литургијата сослужуваа протоереј Миле Штрбевски, свештеник Крсте Шабанов, свештеник Димче Ставревски, јеромонах Атанасиј, јеромонах Спиридон, јероѓакон Пајсиј, ѓакон Влатко Стоименов и ѓакон Васил Ристовски. 

  

   

На 12. 04. 2013 година, во петок од четвртата седмица од Великиот Пост, во црквата „Успение на Пресвета Богородица“ во Велес се отслужи четвртата статија од Богородичниот Акатист. На вечерната богослужба сослужуваа протоереј Ристе Јанушев, свештеник Борислав Бобевски и свештеник Драги Гаштарски.

На крајот на вечерната богослужба беа благословени и прекршени празничните лебови.

Известува свештеник Јованче Илиев.

На 07. 04. 2013 година, во третата, Крстопоклона недела од Великиот пост, кога Светата Црква молитвено го чествува споменот на Светото Благовештение, во Полошкиот манастир „Св. Ѓорѓи“ на Тиквешкото езеро, се отслужи Света Божествена Литургија. На Литургијата чиноначалствуваше Митрополитот Повардарски г. Агатангел во сослужение на јеромонахот Атанасиј и јероѓаконот Пајсиј. На Литургијата присуствуваа монахињата Магдалена и останатите искушенички при ова сестринство. 

 

 

 

 

 

 

 

На 07. 04. 2013 година, во третата, Крстопоклона недела од Великиот пост, кога Светата Црква молитвено го чествува споменот на Светото Благовештение, во храмот „Успение на Пресвета Богородица“ во Велес, се отслужи Света Божествена Литургија. На Литургијата чиноначалствуваше свештеникот Драги Гаштарски, а сослужуваа ѓаконите Влатко Стоименов и Васил Ристовски. Многубројниот  народ на Литургијата се причести со Светите Христови Тајни.

Свештеникот Гаштарски го изнесе светиот Крст од олтарот и го постави во средината на храмот - извршувајќи поклонување на чесниот Крст. Потоа и сите присутни верници пристапија кон поклонување и целивање на светиот Крст, а свештеникот на секој верник му даруваше китка босилек.

 

 

 

Во третата Недела од Воскресниот пост се поклонуваме на Чесниот и Животворниот Крст Господен, кој нè укрепува во деновите на жалост, потсетувајќи нè на бесконечната љубов на нашиот Спасител, Кој прими крстни страдања заради нас грешните. Оваа Недела се нарекува »крстопоклона« и се одликува со тоа што Крстот се изнесува на средината на храмот за поклонение.