Skip to content
  • JoomlaWorks AJAX Header Rotator
  • JoomlaWorks AJAX Header Rotator
  • JoomlaWorks AJAX Header Rotator
Прегледувате: Насловна


Едиција „Библиски настани“ бр. 8
26.12.2011.
Sample Image
 

Излезе од печат осмиот број од илустрираната едиција „Библиски Настани“, со работен наслов Страшниот Суд, во кој е обработен расказот за пророкот Еремија.

Илустрираната едиција „Библиски Настани“ содржи 14 изданија, кои ќе се печатат во тираж од 10.000 броја, а ќе излегуваат од печат во определен временски интервал. Вакво илустрирано библиско издание се печати за првпат во историјата на издаваштво на Македонската Православна Црква, а досега не се испечатени слични изданија ниту во останатите православни цркви на Балканот.

 

 
 
Света Божествена Литургија, Росоман
26.12.2011.

 

Sample Image

 

На денот кога Светата православна црква го чествува споменот на Свети Спиридон Чудотворец, епископ Тримифунтски и Светиот свештеномаченик Александар, епископ Ерусалимски, Митрополитот Повардарски отслужи Света Божествена Литургија во храмот „Света Троица“ во Росоман.

Свети Спиридон Чудотворец, епископ Тримифунтски     25/12/2011

Место на раѓањето и на службата на овој славен светител е островот Кипар. Роден е од прости родители, земјоделци, а и самиот беше и остана прост и смирен сѐ до својата смрт. Во младоста се ожени и имаше деца. А кога умре жена му, тој сиот се предаде на служба на Бога. Заради неговото особено благочестие беше избран за епископ на градот Тримифунт. Но тој и како епископ не го измени својот прост начин на живеење и околу својата стока и обработката на земјата се трудеше самиот лично. За себе многу малку употребуваше од стекнатото, поголемиот дел им го раздаваше на бедните луѓе. Со Божјата сила покажа големи чуда: низведе дожд во време на суша, го запре текот на реката, воскресна неколку мртовци, го исцели царот Констанс од тешка болест, ги виде и ги слушна ангелите Божји, проѕираше во тајните на човечките срца, многумина обрати во вистинската вера итн. Учествуваше на Првиот Вселенски Собор во Никеја и со своето просто но јасно исповедање на верата, како и со многубројните моќни чуда што ги изврши, голем број еретици ги врати во Православието. Беше облечен толку просто, што кога еднаш поканет од царот сакаше да влезе во царскиот дворец, војникот мислејќи дека е некој просјак му удри шлаканица. Кроткиот и незлоблив Спиридон му го заврти и другиот образ. Откако Го прослави Бога со многубројни чуда и на многумина им покористи поединечно, а и на целата Божја Црква, се упокои во Господ во 348 година. Неговите чудотворни мошти сега се на островот Крф и ден денес Го прославуваат Бога со многубројни чуда.

 

 
Свети Никола Мирликиски Чудотворец
20.12.2011.

 

Sample Image

 

„Вистината на сè како правило на верата, образец на кротоста и учител на воздржливоста те покажа на стадото твое; заради тоа си го придобил со смирението – возвишеното, а со сиромаштвото – богатството; оче свештеноначалниче Никола, моли Го Христа Бога да ги спаси нашите души“ (тропар на свети Никола Мирликиски Чудотворец).

На 19.12.2011 година го прославивме споменот на светиот Никола Чудотворец архиепископ Мирликиски, ревносниот поборник на вистината и учесник на Првиот вселенски собор. По тој повод, во храмот „Св. Никола Геракомија“ во Охрид, беше отслужена света архиерејска Литургија, на која чиноначалствуваше Неговото Високопреосвештенство Митрополитот Дебарско-кичевски г. Тимотеј, во сослужение на Митрополитот Повардарски г. Агатангел, архимандрит Партениј, свештеник Љупчо Симиџиески, јеромонах Доситеј и ѓаконите Владо Недески и Васко Голабоски. На Литургијата присуствуваа мноштво верници, кои дојдоа да го прослават светиот Никола, чиј култ во Охрид, но и во цела Македонија, е многу голем. Митрополитот Агатангел се обрати кон присутните верници со пригодно слово и им подели нафора.

По завршувањето на Литургијата, свештенството се упати во резиденцијата на Митрополитот Тимотеј каде беше прекршен празничниот колач. Светиот Никола нека Ве чува на сите Ваши патишта и секогаш нека биде Ваш пример и заштитник. На многаја лета!   

Oвој славен светител, когошто и денес го слават по сиот свет, им беше единец син на своите богати и угледни родители, Теофан и Нона, жители на градот Патара во Ликија. Бидејќи им беше син единец даруван од Бога, тие Му го посветија на Бога, принесувајќи Му така дар. Знаењето за духовниот живот Св. Николај го стекна преку својот чичко Николај, епископот Патарски, и се замонаши во манастирот „Новиот Сион“, основан од тој негов чичко. По смртта на родителите Николај им го раздаде наследениот имот на сиромасите и ништо не задржа за себе.

Додека беше свештеник во Патара тој многу се прочу со делата на својата милостиња, иако ги криеше грижливо, за да го исполни зборот Господов: „Да не знае твојата лева рака што прави твојата десна рака“ (Матеј 6, 3). Кога се предаде на самотност и на безмолвие, мислејќи така да проживее до смртта, му дојде глас одозгора: „Појди на подвиг меѓу народот, ако сакаш да бидеш од Мене овенчан.“ Веднаш потоа според чудесната Божја Промисла беше избран за епископ на градот Мир во Ликија. Милостив, мудар, неустрашлив. Св. Николај му беше вистински добар пастир на своето стадо. За време на гонењето на христијаните под Диоклецијан и Максимијан го фрлија во затвор, но тој и во затворот ги поучуваше луѓето на законот Божји.

Присуствуваше на Првиот Вселенски Собор во Никеја и од голема ревност за вистината го удри еретикот Ариј. За ова дело го отстранија од Соборот и од архиерејската служба, сѐ додека на неколкумина од првите архиереи на Соборот не им се јавија Самиот Господ Христос и Пресвета Богородица и не го објавија своето благоволение кон Николај. Чувар на Божествената вистина, овој чудесен Божји светител беше и одважен заштитник на правдата меѓу луѓето. На двапати спаси по тројца луѓе од незаслужена смртна казна.

            Милостив, вистинољубив и праведен, одеше меѓу луѓето небаре ангел Божји. Уште за време на животот луѓето го сметаа за светител и го повикуваа на помош во маки и неволји и им се јавуваше во сон и на јаве на тие што го повикуваа, еднакво лесно дали се блиску или далеку, и им помагаше. Од неговото лице блескаше светлина како од лицето Мојсеево, па и со самата своја појава им носеше на луѓето утеха, мир и добра волја. На старост малку се разболе и се упокои во Господа, многустрадален и многуплоден, за вечно да се весели во Небесното Царство продолжувајќи да чудотвори на земјата, помагајќи им на верните и прославувајќи Го својот Бог. Се упокои на 6 декември 343 година.

Преземено од страната на Дебарско-кичевската епархија: www.dke.org.mk

 
Света Божествена Литургија, Валандово
20.12.2011.

 

Sample Image

 

На денот кога Светата православна црква го слави споменот на Свети Сава Осветен; Преподобен Нектариј Битолски и Преподобните Карион и Захарија, Митрополитот Повардарски г. Агатангел во сослужение на Митрополитот Европски г. Пимен и повеќе свештенослужители отслужи Света Божествена Литургија во храмот „Св. Димитриј“ во Валандово.

 
Св. петнаесет Тивериополски маченици
12.12.2011.

 

Sample Image

 

На денот кога Македонската православна црква го чествува споменот на Светите петнаесет Тивериополски маченици, Митрополитот Повардарски г. Агатангел отслужи Света Божествена литургија во црквата „Св. Атанасиј“ во Богданци. На Литургијата сослужуваа свештеници од гевгелиското намесништво, а молитвено присуствуваа многумина верници од кои поголем дел се причестија со Светите Христови дарови.

 
Светиот великомаченик Георгиј
9.12.2011.

 Sample Image

На денот кога Светата Православна Црква го слави споменот на светиот великомаченик Ѓорѓи, Митрополитот Повардарски г. Агатангел отслужи Света Божествена Литургија во манастирот посветен на овој светител во Неготино. На Литургијата сослужуваа свештеници од кавадаречкото намесништво на епархијата.

Голем број на верници молитвено присуствуваа на Литургијата, а дел од нив се причестија, примијќи ги Светите Христови дарови.

По завршувањето на Литургијата, Митрополитот и свештениците се упатија во дворот на манастирот каде ги осветија и ги прекршија славските колачи и осветија вода за здавје и спасение на верниците.

 

 
<< Почеток < Претходна 31 32 33 Следна > Крај >>

Резултати 1217 - 1240 од 1240