Skip to content
  • JoomlaWorks AJAX Header Rotator
  • JoomlaWorks AJAX Header Rotator
  • JoomlaWorks AJAX Header Rotator
Прегледувате: Насловна


Ѓурѓовден, Пирава
7.05.2018.
 Sample Image

Sample Image На празникот на Светиот великомаченик Георгиј - Ѓурѓовден, Митрополитот Повардарски г. Агатангел отслужи Света Божествена Литургија во храмот посветен на овој светител во валандовското село Пирава. На Литургијата сослужуваа повеќе свештеници од гевгелиското намесништво на епархијата. Со оваа Литургија, започнаа и низата духовни настани за одбележување на јубилејот 40 години од формирањето на Повардарската епархија, па така во оваа прилика Митрополитот Агатангел додели три највисоки одличја на Повардарската епархија - Орден за црковни заслуги, на  г-дин Николче Чурлиновски, поранешен градоначалник на Општина Валандово, г-дин Тодор Василев и г-дин Александар Николов, двајцата од црковниот одбор во селото Пирава.

На Литургијата присуствуваа голем број верници од Пирава и околните села кои традиционално го празнуваат Ѓурѓовден и како слава на селата во кои живеат.  Присутните верници се причестија со Светите Христови дарови, а по завршувањето на Литургијата беше осветен и празничен колач за здравје и спасение на верниците.

 

Светиот великомаченик Георгиј    

О

вој славен и победоносен светител беше роден во Кападокија од богати и благочестиви родители. Татко му пострада за Христа, а мајка му се пресели во Палестина. Кога порасна, Георгиј отиде во војска и во својата дваесетта година го стекна чинот трибун и како таков служеше при царот Диоклецијан. Кога овој цар започна страшно гонење на христијаните, Георгиј истапи пред него и одважно исповеда дека е христијанин. Царот го фрли во затвор, па нареди нозете да му ги стават во клади, а на градите да му положат тежок камен. Потоа нареди и го врзаа на тркало под кое имаше штици со големи клинци и така го вртеа додека целото тело не му се направи една голема рана. По ова го закопа во ров, така што надвор од земјата му беше само главата и го остави во ровот три дена и три ноќи. Потоа со помош на некој магионичар му даде да испие смртоносен отров. Но при сите овие маки Георгиј непрестајно Го молеше Бога и Бог веднаш го исцелуваше и на големо одушевување на народот, го спасуваше Својот маченик од смртта. Кога Св. Георгиј воскресна и еден мртовец, тогаш многумина ја примија верата во Христа. Меѓу овие беше и царевата жена Александра и главниот жрец Атанасиј, земјоделецот Гликериј, и Балериј, Донат и Терин. Најпосле царот ги осуди Свети Георгиј и својата жена Александра на смрт со меч. Блажената Александра издивна на губилиштето пред да ја убијат, а Свети Георгиј го убија во 303 година. Безбројни се чудата што се јавија на неговиот гроб. Многубројни се и неговите јавувања во сон и на јаве на многумина коишто го спомнуваат и ја бараат неговата помош до денешен ден. Сиот разгорен од љубов кон Господ Христос, Свети Георгиј без тешкотии остави сѐ заради својата љубов: чин, богатство, царски почести, пријатели и сиот свет. За оваа љубов Господ го награди со венец на невенлива слава на небото и на земјата и со живот вечен во Своето Царство. И го дарува со сила и власт да им помага на оние што го слават и призиваат неговото име во бедите и неволјите. 
 
Освет на камен-темелник
2.05.2018.

 

Sample Image

 

На 29. 04. 2018 година, со благослов на Митрополитот Повардарски г. Агатангел, се изврши осветување на камен-темелник за нова црковна трпезарија при црквата „Св. Илија“ во село Виничани. Осветувањето го извршија протоереј Борислав Бобевски и свештеник Влатко Божинов.

 

Sample Image    Sample Image
Sample Image    Sample Image

 

 
Нови изданија од Повардарската епархија
30.04.2018.

 

Sample Image

 

Со благослов на Неговото Високопреосвештенство, Митрополитот Повардарски г. Агатангел се подготви и се испечати трилогијата „ПРОПОВЕДИ И БЕСЕДИ“ од Свети Филарет Московски. Книгите ги преведе дипломираниот теолог Гонца Анастасова-Запрова. Овие најнови изданија на издаваштвото на Повардарската епархија „Св. Ѓорѓи Полошки“ излегуваат од печат непосредно пред започнувањето на годинешниот Саем на книгата, така што сите оние кои сакаат да ги купат, можат да ги најдат на штандот на Македонската православна црква на годинешниот Саем на книгата или да ги порачаат директно од Повардарската епархија на тел. 043 221 231. 

Во прилог можете да го прочитате и предговорот на оваа трилогија.

 Предговор

Светиот Филарет Московски е роден на 26 декември 1782 во гратчето Коломна, од семејство во кое имало повеќе свештеници. Поради неговата длабока вера се запишал во духовна семинарија, и таму се покажал неговиот возвишен проповеднички дар, за кој, дури и најдобриот проповедник, митрополитот Платон, кој и го ракоположил рекол: „Јас проповедам човечки, а Филарет – ангелски“. Иако бил многу млад, сепак, според евангелските зборови, дека светило не се крие под поклоп, така и тој не можел да ги скрие многубројните таленти.

Во 1808 година примил монашки постриг од страна на митрополитот Московски Платон, а набрзо бил ракоположен во ѓаконски чин. Му било дадено послушание да предава и да проповеда. По две години бил ракоположен во јеромонах, и постојано бил ангажиран како професор или ректор во богословските школи. Поради добрите проповеди неговото име се прочуло насекаде, особено меѓу образованите луѓе. Му била доверена голема задача, да го преведе Светото Писмо на руски јазик. Собрал тим од одлични преведувачи, и самиот тој учествувал во тоа дело, но не било целосно завршено. Во 1817 година бил ракоположен за епископ, викар на Петербуршката епархија, а по две години му била доверена Тверската епархија како архиепископ и член на Синодот. Во 1821 бил преместен во Московската катедра. Во 1823 бил испечатен неговиот Катехизис, кој набрзо бил преведен на повеќе јазици.

Неговото пастирско служење не било без проблеми и недоразбирања, дури имало обиди за негово оддалечување во далечна епархија, но светителот со велик дух сето тоа го претрпел и за неколку години почнале кај него да доаѓаат за совет многу архиереи, пастири, како и императори, кнезови, министри и сенатори, губернатори и генерали. Иако бил послушен на царот, сепак откажувал послушност секогаш кога барањата на царот се косат со неговата христијанска совест.

Освен несреќите и сиромаштијата, рускиот народ страдал од страста на пијанството, па светителот многу се грижел за оваа состојба и се трудел со разни мерки да го одврати доверениот му народ од оваа страст. Најголемо дело го сметал служењето на Божествената литургија, па така, и во длабока старост, служел Литургија секоја недела, освен кога бил спречен поради болест.

Многу голема радост имал при осветување на нов храм, па во неговото архиерејско служење осветил десетици храмови. Редовно проповедал, со тивок глас, бавно, никогаш напамет, туку секогаш читал од хартија. Благодарение на неговите запишани проповеди денес имаме огромно богатство за целата црква.

Не се грижел толку за формалното уредување на епархијата, туку повеќе за духовното изградување. Некогаш бил благ и снисходлив, а некогаш строг, секогаш раководејќи се од доброто на Црквата и спасението на човечките души. Особено се грижел за Московската духовна академија, каде што под негов надзор бил започнат голем труд – превод на делата на светите отци на руски јазик.

Не сакал човечки пофалби, и кога некој така ќе му се обрател, луто и остро го укорувал да не му дава епитети, кои тој не ги заслужува. Со тоа покажувал дека работи за Господ, а не за своја слава и суета. Овој смирен и скромен великан на Руското православие, освен високото и сестрано образование, добродетелниот и строг подвижнички живот, се одликувал и со дар на чудотворство, кој го покажал во текот на неговиот живот, извршувајќи многу чуда.

На 19 ноември 1867 по отслужената неделна литургија, стариот владика бил да се измие лице, и тука ја предал душата на Бога, Когошто го возљубил со сето свое срце, со сета своја душа.

Неговите свети мошти биле положени во Троице-сергиевата лавра, заедно со моштите на светиот Инокентиј Московски. Канонизацијата на светиот Филарет била извршена во 1994 година, а неговиот свет спомен се слави на 19 ноември, денот на неговото упокојување.

Во трилогијата која ја имате пред вас се поместени голем број избрани проповеди за господовите, богородичните и светителските празници, проповеди при осветување на храмови, проповеди во чест на царските имендени и други избрани проповеди. Ова дело е големо богатство за нашата Света Македонска Православна Црква – Охридска архиепископија, и Му благодариме на Бога што ни даде сили да го издадеме ова капитално дело. Искрено посакувам во секој православен дом да се најдат книгите на светиот Филарет, и по неговите поуки и молитви за нас, да нѐ води кон свет живот, живот во заедница со Бога и со ближните. Амин.

Митрополит Повардарски

+ Агатангел 

 

 

 
Освет на камен-темелници
25.04.2018.

 

Sample Image

 

Sample Image На 24. 04. 2018 година, Митрополитот Агатангел во сослужение на свештенството од градот Велес, изврши осветување на камен-темелници на камбанарија и административни простории со крштална при црквата „Св. Јован Крстител“ во Велес.

 
Освет на камен-темелник на нова црква
23.04.2018.

 

Sample Image

 

Sample Image На 22. 04. 2018 година, во Неделата посветена на Жените Мироносици, во црквата „Св. Кирил и Методиј“ во Велес се отслужи Архиерејска Божествена Литургија, на која чиноначалствуваше Митрополитот Повардарски г. Агатангел во сослужение на протоереј Борислав Бобевски, свештеник Игор Пармачки и протоѓакон Влатко Стоименов. По Литургијата, Митрополитот Агатангел изврши осветување на камен-темелник на нова црква, посеветена на светите апостоли Петар и Павле, во велешката населба Превалец.

 
Православна светлина бр. 45
18.04.2018.

Sample ImageИзлезе од печат 45-от броја на „Православна светлина“. Во овој број, стандардно, како и досега, обработивме  теми од нашата православна вера и живот и се надеваме дека и овој број ќе ја збогати Воскресната радост кај сите верници кои ќе го имаат во своите раце во овие торжествени денови, кои нè очекуваат.

Списанието е бесплатно и можете да го земете за време на претстојните Велигденски служби низ храмовите во Повардарската епархија.

 

 

 

Електронска верзија  на списанието (PDF) тука.

 
Повеќе...
<< Почеток < Претходна 1 2 3 4 5 6 7 8 9 10 Следна > Крај >>

Резултати 115 - 152 од 932