Величенствено, возвишено, христијански....

    Ниту најубавите зборови, ниту суперлативите не можат да ја прераскажат вчерашната Божествена атмосфера, која ја обзема секоја христијанска душа на жителите на Велес. Чествувањето на Успението на Мајката Богородица, во Велес само ја надополни целата прекрасна атмосфера која беше присутна на секое парче македонска земја. Вториот Велигден, за нас православните христијани, како што милостиво Митрополитот Агатангел го нарече вчерашниот ден, беше вистинска можност за демонстрација на она што вистински тлее во нашите души, а тоа е несогорливиот и силен христијански дух, тоа е потребата од Господ Бог, тоа е потребата од нашата Света македонска црква, тоа е потребата од нашето заедничарење....

    Одлуката на македонската влада за прогласување на денот на Успението на Пресвета Богородица за неработен се покажа како вистински оправдан потег, затоа што македонскиот народ, како што му доликува на еден древен народ од една библиска земја, во целост го искористи овој ден за молитвено поклонение кон Мајката Божја.

     На самиот ден на чествувањето на Успението на  Благословената Дева Марија, Митрополитот Агатангел во сослужение на свештенството отслужи Света архиерејска литургија. На почетокот на Литургијата, Митрополитот Повардарски благоволи и го потстрижа свршениот богослов, чедото Божјо Васил Ристовски, во чин чтец.

    Милостивите и ангелски звуци на црковниот хор „Св. Вмч. Пантелејмон” од Велес, причестувањето со Светите Христови Тајни, илјадниците христијански души, кои смирено го чекаа својот ред во недогледната колона  луѓе пред православниот храм, за да и се поклонат на Мајката Божја и да ја помолат за да ги застапува нивните души пред престолот на Спасителот, беа Божествените моменти кои вистински не воведоа во осмиот ден, кои не доближија до Седржителот и во целост ни ја покажаа вистинската димензија на Светата Литургија, како единствен и непобитен извор на нашата духовност и на нашето спасение.   

    Во своето празнично Слово, во беседата изречена пред бројните верници, Митрополитот Агатангел ни ја претстави славата на Мајката Божја, нејзината неизмерна љубов и величие. Тој упати порака, Благословената Дева Марија да ни служи како огледало, како жива икона на библиски христијанин, да се моделираме самите по примерот на благословената Дева Марија, зашто таа е онаа која највозвишено слуша. На Благовештението таа слушаше со покорност и му одговори на ангелот, „Нека ми биде според зборовите твои” (Лк. 1:38). Таа не би можела да го прими Словото Божјо во нејзиното тело, ако прво не го слушнала Словото Божјо во нејзиното срце. Кога пастирите го видоа и се восхитуваа на новородениот Христос, „Марија ги пазеше сите тие зборови, слагајќи ги во срцето свое” (Лк.2:19). Истата потреба од послушност е нагласена и во последните зборови, посветени на Мајката Божја во Светото Писмо, на венчавката во Кана Галилејска: „Се што ќе ви рече, направете!” (Јн. 2:5) им рече таа на слугите и на сите нас.

    На крајот од својата беседа, Митрополитот Повардарски г. Агатангел ги помоли сите присутни верници да ја сакаат и да ја почитуваат својата мајка и својот татко, исто како што би сакале и нивните чеда секогаш да ги сакаат и да ги почитуваат нив и ги помоли сите кои имаат било какви недоразбирања со своите родители, да отидат на овој ден, да ги посетат, да побараат прошка и да ги надминат сите недоразбирања.

     Светата Божествена Литургија во Велес ја проследи и министерот за правда, г-нот Михајло Маневски, велешките пратеници во законодавниот дом на Република Македонија, како и градоначалникот на Велес, г-нот Аце Коцевски, кој редовно ги посетува богослужбите.  

       На крајот од Литиргијата верниците се причестија со Светите Христови Тајни.

    Чествувањето на Успението на Мајката Божја во Велес помина во вистинска православна христијанска атмосфера, токму онака како што ни доликува, но останува впечатокот дека ова би требало да ни послужи како пример како треба да ги чествуваме сите моменти од црковниот живот, како треба да се однесуваме внатре во црквата за да бидеме подобни на Бога, за да биде нашата христијанска и македонска заедница силна и вечно одржлива.